Mu rwego rwo gukomeza kurwanya ubucukuzi bw’amabuye y’agaciro bukorwa mu buryo butemewe n’amategeko no kurushaho kunoza umutekano,  muri Rutongo Mine habereye inama y’umutekano  yahuje  abayobozi batandukanye n’inzego z’umutekano bo mu turere twa Rulindo,Gasabo na Gicumbi. 

Abitabiriye inama baganiriye ku bibazo biterwa n’ubucukuzi butemewe n’amategeko ndetse bafatira hamwe ingamba zigamije gukaza umutekano, gukumira ibikorwa binyuranyije n’amategeko no guteza imbere imikoranire hagati y’inzego zitandukanye n’abaturage.

Akarere ka Rulindo ni kamwe mu gakorerwamo ubucukuzi bw’Amabuye y’agaciro bwa wolfram,Gasegereti,zahabu ndetse na kariyeri ubu bucukuzi bukorwa mu buryo bwemewe na kampani ya Trinity metal ifite ibigo bibiri bikora ubucukuzi bw’amabuye y’agaciro mu karere ka Rulindo aribyo Trinity metals Nyakabingo icukura wolfram mu murenge wa Shyorongi ndetse na Rutongo mine icukuru Gasegereti mu mirenge ya Masoro,Murambi ,Cyinzuzi na Ntarabana.

Ubundi bucukuzi bukorwa mu buryo butemewe ni ubucukuzi bwa zahabu bukorerwa mu mirenge ya Base ,Rukozo na Cyungo aho ababukora bangiza ibidukikije n’imyaka y’Abaturage. Ubucukuzi butemewe kandi bunakorerwa muri iriya mirenge ya Masoro,Murambi, Ntarabana ,Cyinzuzi na Burega  icukurwamo gasegereti 

Abakora ubu bucukuzi kandi banakekwaho guteza umutekano muke uterwa n’businzi n’urugomo rukorwa nabakora ubucukuzi mu buryo butemewe.

Gusa nubwo bimeze bityo ubuyobozi bw’Akarere ka Rulindo bufatanyije n’izindi  nzego zitandukanye ntizihwemo gushaka umuti w’iki kibazo aho mu bihe bitandukanye hagiye hakorwa inama n’abaturage bo muri iyi mirenge mu rwego rwo kubakangurira kwirinda gukora ubucukuzi bw’amabuye y’Agaciro mu buryo butemewe. 

Mu kwezi kwa munani k’umwaka ushize wa 2025 ubuyobozi bw’Akarere bwafatanyije n’ikigo cy’igihugu gishinzwe ubucukuzi mu Rwanda RMB ndetse n’Urwego rw’igihugu rw’ubugenzacyaha RIB mu bukangurambaga bugamije gukangurira abaturage kwirinda kwishora mu bikorwa by’ubucukuzi bw’Amabuye y’Agaciro butemewe no kubasobanurira amategeko n’ibihano bihabwa ababikora Ubu bukangurambaga bwatangiriye mu murenge wa Murambi bukomereza Masoro na Cyinzuzi.

Uretse ubu bukangurambaga Kandi Abayobozi mu nzego zitandukanye bagiye bakorana inama n’abaturage bo mu murenge wa Masoro na Murambi mu rwego rwo kurushaho kwigisha abaturage gkwirinda ubucukuzi butemewe.

mu ntangiriro z'uku kwezi kwa gatanu Umuyobozi w'Akarere MUKANYIRIGIRA Judith hamwe n'abagize inzego z'Umutekano bakoranye inama n'abaturage bo mu murenge wa Cyinzuzi ,Masoro ,Murambi,Burega na Ntarabana mu rwego rwo kubakangurira kwirinda ibikorwa by'ubucukuzi butemewe no gufatanya n'ubuyobozi kurushaho kubungabunga umutekano batangira amakuru ku gihe.