Kuri uyu wa 28 Gicurasi 2026, Umuyobozi w’Akarere ka Rulindo, Madamu MUKANYIRIGIRA Judith, yakiriye itsinda ry’Abadepite riyobowe na Hon. Ayinkamiye Speciose, bari mu ngendo rusange zigamije gusura no gukurikirana ibikorwa byo kongera umusaruro w’ubuhinzi hirya no hino mu gihugu.

Mu biganiro byabereye ku cyicaro cy’Akarere, ubuyobozi bw’Akarere ka Rulindo bwagejeje ku Badepite ishusho rusange y’iterambere ry’urwego rw’ubuhinzi, bugaragaza gahunda zitandukanye zashyizwe mu bikorwa hagamijwe kuzamura umusaruro w’ubuhinzi.

Akarere kandi kagaragarije Intumwa za Rubanda uburyo ibibazo abaturage bari baragejeje ku Badepite mu ngendo zabanje byakemuwe, ndetse hanasobanurwa ingamba zikomeje gushyirwa mu bikorwa mu gukemura ibikiri inzitizi mu rwego rw’ubuhinzi n’iterambere ry’icyaro.

Nyuma y’ibiganiro, Abadepite bagiranye inama na Komite Nyobozi y’Akarere ndetse n’abahagarariye ibyiciro bitandukanye by’abaturage, baganira ku rugendo rw’iterambere ry’ubuhinzi n’uruhare rw’abafatanyabikorwa mu kongera umusaruro w’ubuhinzi.

Muri uru ruzinduko, Abadepite banasuye ibikorwa by’ubuhinzi biri mu Murenge wa Bushoki, birimo ahatuburirwa imbuto y’ibirayi, baganira n’abahinzi ku buryo izi mbuto zifasha mu kongera umusaruro no guteza imbere ubuhinzi bw’umwuga.

Basuye kandi abaturage bo mu Kagari ka Gasiza, Umurenge wa Bushoki, aho baganiriye ku byagezweho mu rwego rw’ubuhinzi ndetse banakira ibitekerezo n’ibibazo by’abaturage hagamijwe gukomeza kunoza gahunda zigamije iterambere ryabo.

Uru ruzinduko rwabaye umwanya mwiza wo kurebera hamwe ibyagezweho, gusuzuma imbogamizi zikigaragara no gushimangira ubufatanye hagati y’Inteko Ishinga Amategeko, ubuyobozi bw’inzego z’ibanze n’abaturage mu rwego rwo gukomeza guteza imbere ubuhinzi nk’inkingi y’ubukungu bw’Akarere ka Rulindo.