Mu Murenge wa Ngoma, Akagari ka Karambo, kuri uyu wa gatandatu, tariki ya 03/08/2024, ku rwego rw'Akarere ka Rulindo, hakozwe umuganda wihariye w'urubyiruko hanatangizwa ku mugaragaro gahunda y'Intore mu biruhuko; ahakozwe ibikorwa byo kubaka ibiro by'Akagari ka Karambo. Ni ibikorwa byitabiriwe n'Umuyobozi Mukuru muri Minisiteri y'Ubutegetsi bw'Igihugu Bwana KUBANA Richard, Umuyobozi w'Akarere wungirije ushinzwe imibereho myiza Bwana MUTAGANDA Theophile, Umuhuzabikorwa w'Inama y'Igihugu y'urubyiruko mu Karere ka Rulindo Mlle MUTIMUKEYE Marie Rose, abayobozi n'abaturage bo mu Murenge wa Ngoma, bari bafite ishyaka ryo kwiyubakira ibiro by'Akagari, aho bazajya bahererwa serivisi.

Nyuma y'umuganda hatanzwe ubutumwa butandukanye. Umuyobozi wa Polisi mu Karere ka Rulindo  SSP John NSANZIMANA asaba urubyiruko kwinda ibiyobyabwenge n'inda zitateguwe, kuko bidindiza iterambere ryabo n'igihugu; gukoresha imbaraga bafite biyubakira igihugu no gukorera ku ntego bagamije kubaka ejo hazaza heza.

Umuyobozi wa Polisi mu Karere ka Rulindo yagize ati : Imbaraga urubyiruko mufite, murasbwa kuzikoresha mu kwiteza imbere mwiyubakira Igihugu kuko ntawe uzaturuka ahndi ngo aze kucyubaka. Murasabwa gukuramaboko mu mufuka mugakora mukiteza imbere, kuko bigayitse kubona umuntu ukiri muto udafite ubumuga asabiriza.

Umuyobozi Mukuru muri Minisiteri y'Ubutegetsi bw'Igihugu Bwana KUBANA Richard yasabye ababyeyi kohereza abana muri gahunda y'intore mu biruhuko, kuko bibafitiye akamaro. Yasabye urubyiruko kwitabira gahunda zigenewe guteza imbere Urubyiruko, zirimo amarushanwa y'imishinga n'andi mahirwe agenda aboneka. Yasabye ubufatanye mu kugarura abana bataye ishuri. Yibukije ababyeyi kujyana abana mu ngo mbonezamikurire y'abana bato hakiri kare; agaruka kuri sistemu y'imibereho, ikubiyemo amakuru y'ingo, asobanura uburyo izajya ikoreshwa mu gufasha abaturage, hatagendewe ku byiciro by'ubudehe, ahubwo umuturage agahabwa ubufasha bitewe n'icyo akeneye, Ubuyobozi bubona yafashwa.

Umuhuzabikorwa w'Inama y'Igihugu y'urubyiruko mu Karere ka Rulindo Mlle MUTIMUKEYE Marie Rose yasabye urubyiruko kugira isuku no kubifashamo ababyeyi; kugira uruhare mu kurwanya imirire mibi n'igwingira mu bana; gukomeza kwirinda ibiyobyabwenge n'inda zitateguwe kandi bagakunda umurimo. Yabasabye kunyomoza abaharabika Igihugu cyacu bifashishije imbuga nkoranyambaga, ariko bakabanyomoza badatukana ahubwo bakoresha ibihamya (facts). 

Umuyobozi w'Akarere wungirije ushinzwe imibereho myiza y,'abaturage Bwana MUTAGANDA Theophile yasabye ababyeyi kohereza abana batatsinze neza amasomo yabo, muri gahunda nzamurabushobozi, asaba ubuyobozi gukurikirana ababyeyi batarimo kohereza abo bana mu ishuri, kuko bidindiza imyigire y'abo bana.

Ibikorwa byashojwe Umuyobozi Mukuru muri Minisiteri y'Ubutegetsi bw'Igihugu ashyikiriza urubyiruko rwo mu Murenge wa Ngoma, imipira yo gukina (uwa basketball n'uwa football). Buri murenge wo mu Karere ka Rulindo wagenewe umupira wa football. Ni imipira bagenewe na Minisiteri y'Urubyiruko n'ubuhanzi, ngo ijye ifasha urubyiruko kwidagadura binyuze mu mikino.