Kuri uyu wa gatanu tariki ya 26/05/2023 bamwe mu rubyiruko rwo mu Karere ka Rulindo bahagarariye abandi mu byiciro bitandukanye ( Abanyeshuri, abari muri Komite y'Inama y'Igihugu y'urubyiruko, abari muri Komite y'urugaga rushamikiye ku muryango FPR Inkotanyi na Youth volunteers) barangajwe imbere n'Umuyobozi w'Akarere Madamu MUKANYIRIGIRA Judith, Umuyobozi w'Akarere wungirije ushinzwe imibereho myiza Bwana MUTAGANDA Theophile n'umuhuzabikorwa w'Inama y'Igihugu y'urubyiruko Mlle MUTIMUKEYE Marie Rose basuye umuhora w'urugamba rwo kubohora igihugu mu Karere ka Nyagatare.

Basuye ahatangirijwe urugamba rwo kubohora igihugu ku mupaka w'u Rwanda na Uganda; umusozi wa Nyampeke, Tabagwe n'indake ya Gikoba; basobanurirwa ko impamvu y'urugamba rwo kubohora igihugu ari uko Ubumwe bw'Abanyarwanda bwari bwarasenyutse, bamwe mu Banyarwanda bagahohoterwa, bakavutswa uburenganzira bwabo. 

Urubyiruko rwasobanuriwe amateka y'umuhora w'urugamba rwo kubohora igihugu; uburyo abarwanye urugamba baranzwe no kwiyemeza, gushyira hamwe n'ishyaka ryo gukunda igihugu, ibyo bikabageza ku nsinzi kandi bari bake. Basabwe kwigira kuri ayo mateka kandi bakabungabunga ibyagezweho.

Umuhuzabikorwa w'Inama y'Igihugu y'urubyiruko Mlle MUTIMUKEYE Marie Rose yavuze ko urugendo bakoze rwabigishije byinshi ku butwari bw'ingabo zatangije urugamba rwo kubohora igihugu zigahagarika na Jenoside. Yagize ati : "Twasobanuriwe ko abenshi mu batangije urugamba rwo kubohora igihugu bari urubyiruko nkatwe, ibyo rero byaduteye ishyaka no kumva ko natwe twifitemo ubushobozi kandi ko nitwubaka ubumwe tuzagera kuri byinshi byiza. Abatangije urugamba rwo kubohora igihugu baranzwe n'indangagaciro zo kwiyemeza, ubupfura (discipline) no kudatezuka cyangwa kudacika intege; natwe rero nk'urubyiruko twabigiyeho byinshi kandi twiyemeje kurangwa n'izo ndangagaciro, kandi tukazigisha n'abandi twasize aho dutuye, dukorera cyangwa twiga."

Urubyiruko rwishimiye uru rugendo rusaba ko uko ubushobozi bubonetse hajya habaho kujyana urubyiruko ahantu ndangamateka bityo rukarushaho gusobanukirwa n'amateka y'Igihugu kandi bakayigiraho ibyiza birimo. 

Urugendo rwagenze neza.